L'accion de la Scèna nacionau que's desvolòpa de l'enfança a l'atge adulte, pendent lo temps escolar, periescolar e extraescolar. Que vòu favorizar l'encontre dab los establiments escolars, centres de lésers, centres sociaus, larèrs d'arcuelh…
En ua logica d'insercion e de solidaritat, la Scèna nacionau qu'arcuelh ua grana diversitat de publics en apitant alianças dab numerosas estructuras-relais deu parçan.
Instituts medicoeducatius, maisons de mainatges de caractèr sociau, larèrs de vita, larèrs e maisons d'arcuelh especializat, centres de reeducacion motora, espitaus de jorn, establiments d'aubergament entà personas atjadas dependentas, maisons de la joenessa e de la cultura, maisons de quartièrs, centres sociaus, associacions d'educacion popularas… Dempuish mantrua annada, aqueras allianças qu'an permetut de tísher ligams estrets dab los pacients, los residents, las personas dab dificultats sociaus, psiquicas o economicas. La Scèna nacionau que tien de desvolopar la preséncia artistica au quite còr d'aqueths establiments.
Associacions culturaus e establiments d'ensenhament artistic
Considerant qui l'aprendissatge d'ua disciplina artistica implica ua confrontacion dirècta a las òbras e aus artistas, la Scèna nacionau que prepausa a las associacions culturaus e establiments d'ensenhament artistic partenaris un programa d'encontres, de talhèrs e d'estagis entà favorizar los escambis enter artistas amators e professionaus. Ua associacion especifica qu'existeish sustot dab lo Conservatòri de País Basco Maurice Ravel
Cultura/ Justícia
Los Ministèris de la Cultura e de la Justícia qu’amian dempuish mei de vint ans ua politica comuna entaus publics plaçats a la man de la justícia, personas detienudas o seguidas en ambient obèrt. La Scèna nacionau, convençuda que la cultura es un vector de revalorizacion personau e d'insercion professionau e sociau, que s'engatja d’emplaçar projèctes especifics en collaboracion dab lo servici penitenciari d'insercion e de probacion deus Pirenèus Atlantics. Aqueths projèctes que son bastits a l'entorn de la programacion de la Scèna nacionau e que hèn compte de la diversitat de las disciplinas e deus mòdes d'expression : conferéncia musicau, talhèr d'escritura, expression corporau, teatre…